Три години се бараше од вас да воведете зелена нафта и тоа го игнориравте, она што ние го направивме, во 2019 –та година ја воведовме мерката за зелена нафта и оваа година мерката продолжува со покривање на 50 отсто од трошоците, му порача министерот за земјоделство, шумарство и водостопанство, Трајан Димковски на дополнителниот заменик-министер, Цветан Трипуновски, во вечерашната емисија „Економски магазин“, на телевизијата Алсат-М.
Министерот Димковски потенцираше дека се што беше ветено во изборната програма е преточено во владината програма, а паралелно се направија неколку измени во програмите во комуникација и според потребите на земјоделците, при што веднаш од почетокот на мандатот се започна со реализација на мерките.
„Веднаш во првите месеци од мандатот се спроведе ревизијата на доделеното државно земјиште, се воведе зелена нафта во 2019-та година, оваа година продолжува мерката, лани се покриваа 30 отсто од трошоците, оваа година овој процент ќе биде 50 отсто. Три години се бараше од вас да воведете зелена нафта и тоа го игнориравте, зар за вас Трипуновски се малку парите што преку оваа мерка се вратија кај земјоделците? Заедно со земјоделците ја креиравме мерката за рурална жена. Доделуваме финансиска поддршка за јакнење на позицијата на жената и нејзината економска активност. Воведовме поврат на персоналниот данок, претходно во време на ВМРО ДПМНЕ земјоделците беа ослободени до 300 илјади денари, ние го зголемивме прагот до 1 милион денари. Лани беше прва година кога се вратија милион и пол евра, и овие пари се вратија преку УЈП на 17.000 земјоделци на кои основна дејност им е земјоделството“, изјави министерот Димковски.
При тоа Димковски му порача на Трипуновски да не манипулира со информациите за финансиската поддршката за жени земјоделки, бидејќи сите земјоделци кои ги исполнуваат условите за мерките за рурална жена и за млад земјоделец, ќе добијат финансиска поддршка.
„Имате тотално непознавање за Програмата за рурален развој кога велите дека за 3 жени ќе има помош. Знаете вие дека кога се објавува мерка од Програмата за рурален развој лоцирате буџетски средства во мерката бидејќи не знаете колку земјоделци ќе ви се пријават, колку договори ќе се потпишат. Така што за мерката за рурална жена, за млад земјоделец ,се дадени индикативни средства за да се објави мерката. Јавниот повик за мерката за рурална жена е завршен,во тек е повикот за мерката за млади земјоделци, за што финансиската поддршка ја зголемивме од 10.000 на 20.000 евра. Тотално ги извртувате и информациите за повратот на персоналниот данок на доход за земјоделците, овие средства ги добиваат оние кои имаат исклучиво приходи од земјоделска дејност“, му порача министерот Димковски, на Трипуновски.
