Генералниот директор за јавна безбедност, Франц Руф, денеска изјави дека главниот осомничен признал сѐ и детаљно ги опишал плановите за нападот. Тој потврди и дека информации за нападите добиле од тајната служба.
Руф додаде дека 19-годишникот, уапсен вчера во Терниц, Долна Австрија, работел на плановите за нападот од јули. На крајот на јули ја напуштил работата и рекол дека има уште многу планови.
Младото момче, кое е родено во Австрија, со родители по потекло од Македонија, забележително го променило својот изглед и се приспоосбило на пропагандата на ИД, пишува ОРФ.
Второто уапсено лице е 17-годишник. Според информациите, тој бил на стадионот „Ернст Хапел“, каде што требало да се одржат концертите на Тејлор Свифт.
И двајцата тинејџери живеат во Терниц, а 17-годишникот неодамна раскинал со својата девојка.
„Социјалната ситуација на двајцата осомничени бил променета“, рече Руф.
Шефот на Управата за државна безбедност и разузнавање, Омар Хајави-Пирчнер, изјави дека при претресот на куќата во Терниц биле пронајдени хемиски супстанции за правење бомби и пропагандни материјали на терористичката организација Исламска држава.
„Тој сакал да се убие себеси и голем број други луѓе со експлозиви, мачети и ножеви“, додаде Хајави-Пирчнер, пренесува ОРФ.
За потсетување, трите концерти на Тејлор Свифт закажани за денеска, утре и задутре во Виена беа откажани поради планираниот терористички напад на стадионот „Ернст Хапел“. Се очекуваше речиси 195.000 луѓе да присуствуваат на трите концерти на распродадениот стадион „Ернст Хапел“ и приближно уште 20.000 фана да ги слушаат концертите надвор од стадионот. Парите за влезниците ќе им бидат вратени.
Истрагата за планираните напади сѐ уште е во тек.
