Даденото ветување пред земјоделците за авансна исплата на субвенциите го исполнивме. Реализирана е првата авансна исплата во висина од 123,2 милиони денари и веќе деновиве 9.563 овоштари на своите сметки ќе ја добијат првата авансно исплатена субвенција во висина од 12.000 денари по хектар, информираат попладнево од Министерството за земјоделство, шумарство и водостопанство.

– Агенцијата за финансиска поддршка во земјоделството и руралниот развој ја изврши исплатата за финансиската поддршка од мерката 1.7 – директни плаќања по обработлива земјоделска површина за оддржување на постоечки овошни насади. Како корисници на оваа подмерка се јавуваат сите земјоделски стопанства што имаат минумум 0,2 ха површина со постоечки овошни насади и се регистрирани во ЕРЗС, се наведува во соопштението.

Како што се додава во соопштението, авансната исплата на субвенциите е „нова мерка која за првпат ја имплементираме оваа година, преку 30% авансна исплата на субвенциите за овоштарите“.

– Веќе од следната 2023 година, авансната исплата продолжува кон сите земјоделци. На овој начин овозможуваме навремена и побрза финансиска поддршка за земјоделците, нагласуваат од Министерството.