Основното јавно обвинителство Скопје донесе Резолуција дека нема место за јавнообвинителска интервенција во поглед на поднесеното писмено известување од техничкиот министер за внатрешни работи, кое се однесуваше на кривично дело – Злоупотреба на службената положба и овластување од член 353 од Кривичниот законик и на кривично дело – Несовесно работење во службата од член 353-в од Кривичниот законик.
Писменото известување се однесуваше на тоа дека има определени недоследности во функционирањето на Оперативно-техничката агенција (ОТА) и на Агенцијата за национална безбедност (АНБ).
Како што соопшти обвинителството, надлежниот јавен обвинител направил проверки во МВР, во ОТА и во АНБ, од каде беа доставени потребните податоци за проверка наводите во известувањето.
„Од анализата на писменото известување, како и на доставените одговори и податоци, произлезе дека реформата на безбедносниот систем, основањето и функционирањето на ОТА и на АНБ, како и начинот на извршување на нивните надлежности, претставуваат системски прашања и од кривично-правен аспект не постои основ за постапување“, се вели во соопштението што го испрати обвинителството.
А кон крајот на мај годинава, министерот за внатрешни работи Наќе Чулев обвини дека поранешната УБК, а сега Агенција за национална безбедност (АНБ) ја задржала техничката можност за следење на комуникациите, што според него е прекршување на законите и препораките на Прибе.
Министерот рече дека нема информација дали АНБ во моментов врши незаконско прислушување, но побара од Јавното обвинителство по допрен глас да истражи кој е одговорен и зошто две години не е воспоставена директна техничка комуникација меѓу Министерството за внатрешни работи и Оперативно-техничката агенција.
„Констатирано е фрапантно кршење на законите – поранешната УБК, а сега АНБ, сѐ уште ја има задржано посредничката улога, во системот за следење на комуникациите, што во суштина значи дека сѐ уште постои техничка можност АНБ да има увид во следењето на комуникациите кои се спроведуваат за потребите на кривичните истраги спроведувани и во надлежност на МВР”, изјави тогаш министерот за внатрешни работи Наќе Чулев.
Извор: Фактор
