Бројките за заболени од ковид-19 и натаму се високи, што значи и дека голем дел од граѓаните и натаму се соочуваат со респираторни проблеми. Но, од денеска, и здравите и болните можат да здивнат од втората тема која доминираше во јавниот простор, пренесе „360 степени“.
Власта и опозицијата конечно се договорија. Избори ќе има на 15 јули.
За да се стигне до овој датум, власта неколкупати во изминатите месеци се откажуваше од своите „црвени“ линии упатени кон опозицијата. Според лидерот на владејачката СДСМ Зоран Заев, не станува збор за попуштање туку за одговорност.
„Мораме да си ги спасиме државата и народот од каков било ризик од дополнително влошување на ситуацијата. Поголема криза од оваа нема да може да издржиме со техничка влада и без парламент. Ова мора да заврши и знам дека преку глава му е на секој граѓанин од политичките игри и од фамозниот датум на избори. Ајде, време е ова да го расчистиме. Ние, јас, СДСМ, преземаме чекор за да им олесниме на сите граѓани веднаш да заврши оваа игра на нерви од која најмногу страда народот. Се знае и кој во минатото бил најодговорен пред народот и државата. Така и овој пат, СДСМ ја покажува својата големина, разбирање и одговорност. За да не страда народот и за да им се овозможи на Мицкоски и на ВМРО-ДПМНЕ на дело да ја покажат својата одговорност, го заклучуваме 15 јули како конечен, последен и единствен датум за избори на кој гарантирано ќе учествува опозицијата“, рече Зоран Заев – претседател на СДСМ.
Според лидерот на СДСМ, условите кои јавно ги декларираше ВМРО-ДПМНЕ-почетокот на набљудувачката мисија на ОБСЕ да биде од првиот ден на кампањата и да има посебни протоколи за гласањето, веќе биле исполнети.
Деталите за кои разговарал со лидерот на ВМРО-ДПМНЕ Христијан Мицкоски се други подробности. Бидејќи 15 јули е среда, договориле денот да биде неработен. Ќе се гласа два часа подоцна од вообичаеното, до 21 часот. На 14 и 13 ќе гласаат изнемоштените, вклучувајќи ги и оние кои се заразени со ковид-19.
Мицкоски, сепак, инсистира дека се согласил на избори затоа што токму сега ги договориле деталите за мисијата на ОБСЕ и за здравствените протоколи. Својот став го образложи доцна вечерва, по состанокот на Централниот комитет на партијата.
„Во овој период се водев од две основни работи. Тоа е заштитата на здравјето на граѓаните и заштита на волјата на граѓаните. И двата услови од страна на Заев и СДСМ конечно се прифатено. Прифатено е да има протоколи за заштита на граѓаните на денот на избори, поточно ранливите категории граѓани да гласаат од дома, правила кои досега не беа прифатени. Како и мисија на ОБСЕ и ОДИХР чија мисија ќе биде заштита на волјата на граѓаните… Дали е ова лесна одлука, одговорот е секако не. Имавме две опции. Да одиме на избори во редовниот рок, но државата ќе продолжеше да тоне. И во декември веќе немаше да биде важно кој ќе биде во владата затоа што се можеше да биде загубено. Државата тоне, а граѓаните страдаат. Или сега во овие сложени околности на тропнеме на маса и да кажеме дека е време за промени и тоа време е за промени сега. Имаме обврска кон државата и сите нејзини граѓани да го поразиме ова раководство на СДСМ и Зоран Заев и да го поразиме веднаш“, рече Христијан Мицкоски – претседател на ВМРО-ДПМНЕ.
Кој е победник, а кој губитник од компромисниот датум е прашање што му го поставивме на универзитетскиот професор и аналитичар Сефер Тахири. Според него, блага предност ќе има власта, бидејќи ковид-19 и топлото време, најверојатно, ќе значат помала излезност на оние гласачи кои немаат директен интерес да гласаат.
„Мислам дека овој датум има предности, но има и свои недостатоци. Сметам дека во прв ред ќе биде одлучувачка масовноста на излезноста, односно колкава ќе биде излезноста на граѓаните на гласање, односно колкав ќе биде бројот на гласачи кои и покрај топлото време и покрај условите и новите околности поради ковид-19, ќе одлучат да излезат да гласаат. Ако излезноста на изборите биде 50%, сметам дека во овој случај предноста е кај власта, бидејќи знаеме дека еден голем дел на гласачите во Македонија, за жал, се клиентелистички и клиентелистичкиот глас во последните изборни процеси одредува кој ќе биде победник“, вели Сефер Тахири – универзитетски професор.
Тахири вели дека излезноста исто ќе влијае и во политичкиот кампус на Македонците и на Албанците. Иако мисли дека и владејачките и опозициските партии добиваат еднакви шанси за натпревар, смета дека во моментов власта има блага предност за победа на 15 јули.
„Односно сметам дека СДСМ, без разлика на неуспехот да реализира некои од програмските цели во областа на правото, на овие избори влегува со една силна „карта“ што се однесува на евроатлантските интеграции, бидејќи ние сме сега земја-членка на НАТО, на некој начин ние сме и земја која ќе ги почне преговорите со ЕУ на конкретен начин, се отвораат поглавјата за преговори со ЕУ. Ова се двата момента на кои власта ќе се обиде да капитализира. Од друга страна, без разлика на влијанието на вирусот ковид- 19, има неколку резултати во економската сфера, не би кажал дека биле одлични, но имаше постепено покачување на плати во сферата на образованието, на културата, на науката, во јавниот сектор, на овие дејности. Мислам дека ова се резултати кои не треба да се негираат. Сметам дека тоа што постои во фактичката реалност и во што опозицијата ќе се обиде да поентира, е нефункционирањето на системот на правото“, вели Сефер Тахири – универзитетски професор.
За постигнатиот договор да се реализира сепак ќе треба да се направат уште неколку чекори, а првиот веќе го направи претседателот Стево Пендаровски кој вечерва донесе нова одлука за прогласување вонредна состојба на територијата на целата држава.
Одлуката е донесена врз основа на член 125 и член 126 од Уставот на предлог на Владата вечерва, а е во времетраење од осум дена, почнувајќи од 15 јуни 2020 година.
