Епизода 1: Отиде во теретана кога сите седеа дома, ама не вежбал, само земал опрема?!

Епизода 2: Отиде на Водно кога сите седеа дома, ама тоа е одраз на немирниот дух на еден “пропаднат спортист”?!

Епизода 3: Пак отиде во теретана да вежба кога сите седеа дома, ургирал кај контакти во МВР за снимки кои наводно се стари и на крај замислете сè се должело само на “отсјај”?!

Епизода 4: Од теретана право во кафана!

После четвртава епизода во која главниот лик седел во затворен дел од кафеана во “Дебар Маало”, додека пазарните инспектори повеќе од 2 часа биле попречувани да ја вршат работата затоа што тој спротивно на сите протоколи уживал во магијата на боемскиот живот, неизбежно се наметнуваат неколку прашања:

  1. Има ли крај оваа трагикомична теленовела со лидеров кој гради успешна актерска, а неуспешна политичка кариера?
  2. Како може незаштитен и неупатен да оди во кафана, а на избори не може да оди заштитен?
  3. Помислил ли како се чувствуваат неговите соработници и партиски колеги кои му стојат како параван на прес-конференциите секојпат кога ќе слушнат за некој негов нов испад и инфантилно однесување?
  4. Каков пример во услови на пандемија им дава на граѓаните првиот човек на најголемата опозициска партија, претендент за мандатар?
  5. Кое ниво на разгаленост и вообразеност е тоа човек да не може да се воздржи од теретана и кафана, додека некои други професии веќе три месеца немале слободен ден за да си го видат семејството?
  6. Дали како одговорен лидер наместо кампања за придржување до мерките води кампања “Дружете се, уживајте, после ќе бришеме снимки и ќе ургираме?!”
  7. Дали еден претендент за премиер смее во услови на пандемија да изјави дека  протоколите биле нови и не му биле доволно познати, дали неговото наводно незнаење го амнестира од одговорност за последиците кои може да ги предизвика со своето незрело однесување?
  8. Со кое право некој кој не ги познава елементарните правила за однесување во време на пандемија излегува на прес-конференција да ја критикува работата на експертите во Комисијата за заразни болести и министерот за здравство?
  9. Дали барем добро си поминал во кафана вчера кога имаме една од најцрните бројки од почетокот на епидемијата, бидејќи е познат како некој на кого здравјето на граѓаните му е на прво место?
  10. Ќе се повлече ли за да отстапи место на некој кој има капацитет да ги апсолвира сите протоколи и мерки бидејќи ваквиот потценувачки однос кон интелигенцијата на граѓаните ја влече целата партија кон дното?

Наместо спасител кој требаше да го дистанцира ВМРО-ДПМНЕ од груевистичкиот режим и да ги санира направените штети по имиџот на партијата, се чини дека партијата доби некадарен лидер кој со својата изразена ароганција и желба за висока функција ја води партијата кон точка од која тешко ќе има враќање назад?!