Вицепремиерот за борба против корупција и криминал, за одржлив развој и човечки ресурси Љупчо Николовски денеска оствари средба со градоначалникот на општина Карпош Стефан Богоев на која порача дека со процесот на имплементирање на Планот За Борбa Против Корупција е опфатена и локалната самоуправа.
„При денешната посета на Општина Карпош, градоначалникот Богоев ме инфомираше дека тие веќе постапуваат по дел од задолженијата. Како дел од активностите, назначено е лице за поднесување пријави, објава на интерни процедури за јавни набавки и изготвување на антикорупциска програма“, информираше Николовски.
„Транспарентноста и отчетноста на локалната самоуправа се главен предуслов за демократски процеси во една заедница и нејзината одржливост. Само на тој начин ќе ги направиме достапни информациите за начинот на кој се распределуваат средствата на граѓаните“, посочи вицепремиерот.
„Ја намалуваме можноста за коруптивни дејствија во секој сегмент на општеството, ја зголемуваме довербата во локалната власт и ја поттикнуваме граѓанската вклученост во процесот“, заклучува Николовски.
