Неколку прашања се наметнуваат по вчерашната изјава на лидерот на опозицијата Христијан Мицкоски по повод неуспешниот обид да се постигне договор околу датумот за одржување избори и по втората лидерска средба кај претседателот Пендаровски:
- Каква потреба почувствува Мицкоски да и се извинува на јавноста заради тоа што морала да биде сведок на вакви лидерски средби? Па, нели лидерските средби беа организирани на негово барање, а такви се какви што се заради неговата политичка и преговарачка неспособност? Или пак можеби станува свесен за својата несвесност, па започнува да го мачи грижа на совест заради неизвесната иднина што и ја сервира на нацијата под закрилата на “грижата за здравјето на граѓаните”?
- Мицкоски бил шокиран од фактот дека на лидерската средба се зборувало за избори, а не за здравјето на граѓаните? Очигледно Мицкоски не ја разбрал целта на лидерските средби кои сам ги бараше. Има кој да прави стручни проценки и да се грижи за здравјето на граѓаните, а тоа се здравствените експерти, а тој со своето однесување единствено влијае на политичкото здравје во државата кое се влошува од ден на ден заради неговата безидејност и немање став.
- Каква функција имаат проценките на експертските мисии, набљудувачките мисии и сите здравствени комисии на светот кога Христијан Мицкоски како експерт над сите експерти си дозволува да оспорува проценки на ОБСЕ и ОДХР, Комисијата за заразни болести? Дали Мицкоски располага со проверени информации и сигурни факти и аргументи кои гарантираат оптимални услови за избори во септември, па со својот став на инаетење ја поништува секоја можност за консензус?
- Како тоа Мицкоски не сакал овој процес на договарање да се претвори во зелен пазар, а секојдневно купува време и продава фрази кои ги слушнавме илјадници пати? Колку неупешни лидерски средби се потребни според алгоритамот на Мицкоски, за тој да се почувствува подготвен за избори?
- Што сака да каже Мицкоски со изјавата дека по завршувањето на вонредната состојба продолжуваат изборните процеси, ама не и изборните активности или и ова е уште една во низата несреќни изјави кои ги дава секогаш кога нема одговор на поставеното прашање, а се чини дека во последно време тоа му премина во пракса. Таков беше и случајот со вчерашното новинарско прашање дали знае уште некоја земја во Европа која е во позиција како нашата и функционира без парламент, на што одговори Словачка. Одговорот очигледно го измисли во моментот со оглед на тоа дека Словачка има функционален парламент.