Од почетокот на пандемијата, луѓето прават се што можат за да се заштитат од коронавирусот. Од миење раце до одржување на дистанца на јавни места, постои бесконечен список на работи на кои се држиме за да се заштитиме. Благите симптоми на „омикрон“ доведоа многумина да размислат дали можеби треба намерно да се заразат.

Зошто луѓето сакаат намерно да се заразат?

Концептот на намерна инфекција произлегува од идејата дека Ковид-19 е неизбежен. Покрај тоа, се верува дека инфекцијата со вирусот може да помогне да се развие долгорочен имунитет. Кога телото само се бори против инфекцијата, станува подобро опремено да се бори со други варијанти на истиот вирус во иднина. Истражувањата сугерираат дека вакцинацијата плус инфекција обезбедува силна заштита од варијанти на коронавирус. Ако се базираме на таа логика, многумина претпоставуваат дека е подобро да се заразиме за да добиеме уште еден слој на заштита.

Иако многумина ја сметаат за практична идеја, експертите од областа на медицината не ја препорачуваат. Д-р Ракеш Пандит вели дека намерната инфекција со коронавирус во овој момент би била глупава работа. Тој објаснува дека ова не е практично решение бидејќи со PCR тестот не може да се открие дали е „омикрон“ или „делта“. Така, никој не може да предвиди со која варијанта ќе се зарази едно лице. Може да биде „омикрон“ или „делта“, но сепак може да доведе до сериозни симптоми подоцна. „Сè уште има 10 до 15 проценти од случаите на делта инфекција“, вели Пандит.

Исто така, сериозноста на инфекцијата зависи од тоа колку вируси влегле во телото.
„Заразувањето со ковид-варијантите не е како да давате одредени дози некому, под претпоставка дека само мала количина од вирусот ќе стигне до вашето тело и дека ќе развиете имунитет. Целосно зависи од тоа колку е заразна личноста која го шири вирусот на други. „Ако таа личност носи голема количина на вирусот, поголема е веројатноста да има потешки симптоми“, рече тој.

„Благ“ е потценет термин за „омикрон“

Неколку студии сугерираат дека „омикрон“ води до благи симптоми, но терминот благ е потценет збор во однос на коронавирусот. Дури и оваа блага варијанта ќе ви пречи во секојдневното функционирање најмалку 10 дена. Ќе мора да се справите со различни симптоми како треска, кашлица, отежнато дишење, болки во мускулите, главоболки, губење на мирис и вкус, гадење и повраќање. Покрај тоа, секогаш постои ризик од развој на долгорочни симптоми.

Д-р Виџеј Дута вели дека многу луѓе не се свесни за сериозноста на инфекцијата со „омикрон“ додека не се соочат со пост-ковид симптоми.

Можете да заразите други

Заразеното лице почнува да го шири вирусот уште пред да ги види симптомите. Ова значи дека не само што ќе се ставите во опасност, туку ќе го пренесете вирусот на другите.

Д-р Пандит предупредува дека е важно да се знае дека не постои регулиран начин да се заразиме со вирусот. Затоа е важно да се следат упатствата издадени од владите за заштита од коронавирус. Вирусот ја менува својата структура и доаѓаат нови варијанти кои го избегнуваат нашиот имунитет. Единствен начин да останете безбедни е да се вакцинирате и да ги следите сите мерки за заштита од инфекција, пишува „timesofindia“.