Вицепремиерот за европски прашања Бојан Маричиќ, денеска во Стразбур се сретна со амбасадорката на ЕУ при Советот на Европа, Меглена Кунева, јавува МИА.
Како што соопшти СЕП, на средбата разговараа за повеќе важни теми, со фокус на евроинтеграцискиот процес на нашата земја, за важноста од регионалната соработка, за новата динамика во соработката со Бугарија и за политичкото и административно искуство на Кунева, како поранешна вицепремиерка за координација на европските политики и институционални прашања на Бугарија.
– Многу корисни совети, научени од искуството, добив од Меглена Кунева, за текот на преговорите со Европската Унија и предизвиците кои не чекаат во тој процес. За нас е од голема важност искуството на Бугарија и споделените научени лекции во преговарачкиот процес, во време кога Секретаријатот за европски прашања е во фаза на подготовка на капацитетите на преговарачките тела, вели Маричиќ.
Амбасадорката на ЕУ при СЕ и поранешната бугарска преговарачка, Кунева, говорејќи за текот на пристапниот процес, кажа дека тоа ќе биде најдобриот период за земјата, што ќе даде ново темпо на реформите и нова енергија на администрацијата, клучна во пристапниот процес.
Кунева даде силна поддршка на новиот дијалог со Бугарија и соработката што ја имаме на сите нивоа, со верување дека брзо ќе ги надминеме разликите и Северна Македонија час поскоро ќе ги започне преговорите со Европската Унија, согласувајќи се со вицепремиерот Маричиќ дека „мора да сме заедно ако сакаме да успееме“, во ова време на глобални кризи и предизвици.
