Парламентарното мнозинство предводено од СДСМ преку усвојувањето на Законот за спречување и заштита од дискриминација на дело ја потврди својата заложба на градење фер, праведно и правично општество за сите, изјави на денешната прес-конференција Бисера Костадинова, пратеничка на СДСМ.
„Со ова законско решение кое е целосно усогласено со правото на ЕУ, се прошируваат основите, се менува и подобро се дефинира поимникот и дефиницијата за дискриминација.
Истовремено, со новиот Закон се зајакнува и капацитетот на Комисија за спречување и заштита од дискриминација, а нејзините надлежности се прошируваат во насока на превенција.
По заокружување на процесот, државата конечно доби нов состав на Комисијата за спречување и заштита од дискриминација, состав кој се одликува со независност и професионалност на избраните членови“, посочи Костадинова.
„За разлика од некои минати времиња кога членови на ова важно тело се бираат строго по партиска директива, актуелниот состав е избран на јавен, транспарентен начин низ строго утврдени критериуми.
Комисијата со новите проширени надлежности ќе има важна улога во превенирање на дискриминацијата и заштита на човековите права.
Очекуваме и ја охрабруваме Комисијата да работи одговорно, совесно и професионално во сузбивање на секаков вид дискриминација.
Во модерно, демократско општество какво што е нашето, нема место за дискриминација кон било која група или поединец.
СДСМ и парламентарното мнозинство што го предводи, остануваат посветени на интересите на сите категории граѓани“, нагласи Костадинова.
